شي مضحك شگد الأنسان الحالي entitled ويحس بمُجرد ولادته يستحق تحقيق أحلامه رغم البشر قديماً مچان عدهم وقت يحلمون اصلاً ويفكرون مگضيها يركضون لاياخذ النمر عضة من طيزهم
البارحة چنت بمدينة الالعاب اريد اتونس وصعدت سفينة نوح حتى اتذكر طفولتي بيها چان يشغلون " تايه في الاماكن ناس بتمشي وانت ساكن" واجتني غصة واريد ابچي وتذكرت شلون چنت اصعد هاللعبة واني ابتدائية واتخيل شلون اصير اعدادية واصير شاطرة ومجتهدة وادخل علمي واصير جراحة ههه طيط
صراحة الحياة غريبة كُلش دائماً يجذبني موضوع تعبيرنا لمشاعرنا واكثر شي احبه قصيدة " انا وليلى" اللي غناها كاظم الساهر حسيت بيها تعبير رهيب ومؤثر جداً عن القهر والحب والمأساة وفرق الطبقات المجتمعية والفقر والبواري
الشي اللي جذبني بيها خصيصاً شلون احنا ك بشر تطورنا من كائنات ماعدها غير الخوف والجوع والقلق وبعض المشاعر الشهوانية حتى نتكاثر " ياريت متكاثرنا"
الى هسة وشلون نگدر نحس بمشاعر تطعن قلبنا رغم انو احنا مو بخطر واقعي بس نگدر نحس بزجاج بقلبنا
الحب القهر الشوق الغضب الهوس والتمني كلها تعجبني بالبشر حتى الغيرة لانها برأيي المشاعر الجديدة الحقيقية .. ومُبهرة جداً بنظري ..
جداً احب الناس اللي يعبرون عن نفسهم بشكل جيد خصوصاً اذا بالشعر هههه احب اكتب شعر واحاول افهم نفسي منه بس هسة مزاجي تعبان احسني ماگدر الزم قلم بدون ما ابچي